قاییت توركوم، گئری دون توركلویونه
تورپاغیوی دوشمن آلدی دینمه دین،
اوز ائل - ایوین قیمتینی بیلمه دین،
لكه لنن ناموسیوی سیلمه دین،
قاییت توركوم، گئری دون توركلویونه!
نامرد لره كؤله اولدوق، قول اولدوق،
اَری اؤلموش قادین اولدوق، دول اولدوق،
هر گله نه، هر گئده نه یول اولدوق،
قاییت توركوم، گئری دون توركلویونه!
بابالا لاردان قالان سازی اونودوق!،
آنا لاردان شیرین سؤزی اونودوق!،
اود یوردوندا، اودو كؤزو اونودوق!،
قاییت توركوم، گئری دون توركلویونه!
گؤرمه دین می نه لر گلدی باشینا؟
باخدیلار می گؤزلرینین یاشینا ؟
زهر تؤكدون اوز الینله آشینا ؟
قاییت توركوم، گئری دون توركلویونه!
آق دام شوشا، قاراباغین تالاندی،
مشكین شَهَر!، هادی شَهَر یالاندی،
فارس آدلاری بوتون ائله جالاندی،
قاییت توركوم، گئری دون توركلویونه!
بوز قورد قالیب قودوز ایتلر ائلینده!
یازماق بیلمیر اولوس، آنا دیلینده
بوغولموشوق روزگارین سلینده
قاییت توركوم، گئری دون توركلویونه
خوجالی دا سویداشلارین قیریلدی،
تبریزینده حاق سؤیله ین ویریلدی،
آذربایجان خریته سی جیریلدی،
قاییت توركوم، گئری دون توركلویونه!
قوچاق نبی، ستار، بابك هاردادی؟
تومروس آنا، زینب پاشا هاردادی؟
شرافتین، پس غیرتین هاردادی؟
قاییت توركوم، گئری دون توركلویونه!
دوشمنلره یولداش دئدیك یار دئدیك،
تیكان لارا مئیوه دئدیك، بار دئدیك،
قارا گونه، بیاز دئدیك، قار دئدیك،
قاییت توركوم، گئری دون توركلویونه!
تاریخ لرده یازیلیب ماد، آریا!!!
بؤلونوبدور آذربایجان یاری یا،
دوز باسیلیر اوركده كی یاری یا،
قاییت توركوم، گئری دون توركلویونه!
كوردلر آلیب اورمییه نی، سولدوزی!
ائدیب كیملر پارس آباد!!، آسلاندوزی؟
هانی بو الكه نین آیی، اولدوزی ؟
قاییت توركوم، گئری دون توركلویونه!
