گونش تبریزین گؤیلرینده دونوردو او گون. گونش زنجاندان میانایا، اورمیه دن خویا، اردبیلدن آستارایا، گونش بوتون آذربایجاندا دونوردو اونلارین ایزی تاریخیمیزدن سیلینمه یه باشلایاندا. سهولری یوخمویدو؟ واردی. بوتون جریانلار کیمی زامانین گره کچه سی ایله داورانیردیلار. طبیعی کی چوخ دا مستقل اولا بیلمه یه جکدیلر. کیم مستقیل داورانا بیلیردی و حتی هانسی شرق ویا حتی غرب اؤلکه سی باشقا گوجلو دولتلری آرخاسینا آلمیرکی؟ هامی بیرجوره شاه-مات اویناییر و هامی بیر جوره بو اویوندا ان آز ایتگی، ان چوخ قازانج ایله چیخماق ایسته ییر. سؤز بیزیم ملی حکومته، سید جعفر پیشه وری یه و وار یوخلارینی آنامیز آذربایجانا فدا ائدن فدایی لره چاتاندا هر شئی اونودولور، مستقیل اولماماق، روسیه یه باغلانماق، بللی بیر ایدئولوژی آرخاسینجا اولماق یادا دوشور. آذربایجان دموکرات فرقه سینین قرارلاری، اساسنامه سی، مرامنامه سی و بونلارین هامیسی نین اؤته سینده اونلارین بیر ایل ایچینده آنا دیلیمیزی رسمی و دولت دیلی سوییه سینه چاتدیرماسی سید جعفر پیشه وری و اطرافینداکی لارین نه درجه آذربایجان ملتینه اؤنم وئردیکلری نین گوجلو و آیدین بیر گؤسترگه سی دیر.

تبریز بازارینی، ساده کندلی لری، شهر اینسانلارینی آشاغی یوخاری بوتون آذربایجانی آرخاسینا آلان، خالقینا یاد بیر باشچی اولانمازدی. بونو هئچ بیر عاغیل- منطیق قبول ائده بیلمیر. یادیمدادیر کئچنلرده بیر دوست آتاسینیدان دانیشارکن آتاسینین پیشه ورییه بؤیوک حؤرمتیندن دئییردی. بیر گون فرشچی آتاسینا، حاجی، دئییرلر سید جعفر کمونیست دیر دئمیشلر. آتاسی، والله من بیلمیرم کمونیست دی نه دی، تک بیلدییم او کی سیدجعفر یاخشی اینساندی. منیم ائتمم گره کنی او ائدیر. فرش کارخاناسیندا اوشاقلارین هر هفته حاماما آپاریلماسینا، اونلارا باخیلماسینا امر وئریب دئمیشدی. بوندان کئچندن سونرا یاشلی آع بیرچک نه نه م هله ده پیشه وری دن دانیشاندا آدینا رحمتلیک کلمه سینی آرتیرمادان سؤز ائتمز.
اونلاری بوت ائدیب ستایش ائدک دئمیرم، طبیعی کی دوشونک، طبیعی کی درس آلاق، حاقلاریندا دوشونک اما چیخارلاری بیزیم چیخارلارا اویمایانلارین فعلینجه خائین دئییب مزارلارین دئشمه یک. انتقاد ائتمک، بیر منتقد کیمی یاناشماق سوچلاماقلا، آد تاخماقلا عینی آنلاما گلمیر چونکو.

تبریزین گولوستان باغیندا هله ده دولاشیرلار بلکه ده سویوقدان دوندورولاراق اؤلدورولن، سونرا جسدلری گونلرجه اوردا قالیب مینلر جوره آشاغیلیغا معروض قالان فدایی لر. هله ده، هله ده آسلانیر، سسله نیر روحلاری دارآغاجلاریندان. زنجان دا عفتینه تجاووز اولمونموش آنالارین-باجیلارین، کیمسه سیز آذربایجانین گوناهسیز یئرلی خالقینین سسی دیر گلن تاریخین قارانلیغیندان. نه ائتمیشدی کی آذربایجان، بوتون ایرانا مدرنلییی ارمغان ائدن، هر زامان قانی سو یئرینه آخان، ایرانی قوروماق اوچون هر زامان سینه گرن بو وطنین نه ایدی سوچو؟ آذربایجانین داها ایللر و اون ایللر اؤنجه گلدییی نطقه یه چوخ گئج چاتان باشقا ایران خالقلاری نییه هله ده خائین دئییب دورورلار بو وطنین اؤز ائولادینا؟

بوتون بونلارا باخمایاراق، سید جعفر پیشه وری و فدایی لرینین آچدیغی جیغیر یقین کی سونراکی نسیل لر طرفیندن ایزله نه جک. اونلاری خیانتله سوچلایانلار دا ایشلرینده اولسونلار، یالانلاری آیاق توتسادا بیر یئردن سونرا یقین کی یئرییه بیلمه یه جک. یاندیریلان تورکجه کیتابلارین توستوسو مین ایللر ایران آدلی جغرافیادان یوکسه له جک و توستوسو دیلیمیزه، کولتوروموزه دشمن خالقلارین همشه گؤزلرینی آجیتاجاق. سئومه ینلرینه اوتانج قایناغی، آلینلارینا لکه اولاجاق گؤزلیم تورکجه نین یانان هر بیر کلمه سی.
.
یوللاری گئدرلی، دوشونجه لری دواملی اولسون
21 آذر بایرامینیز مبارک اولسون
.
.