Ulduz sayaraq gözləmişəm hər gecə yarı

Gec gəlmədədir yar, yenə olmuş gecə yarı  

Gözlər asılı, yox nə qaraltı , nə də bir səs

Batmış qulağım, gör nə düşürməktədi dari

Bir quş, ayığan, söyləyərək gahdan ıyıldır

Gahdan onu da yel diyə lay-lay huş aparı

Yatmış hamı, bir allah oyaqdır, daha bir mən

Məndən aşağı kimsə yox, ondan da yuxarı

Qorxum budu yar gəlməyə birdən yarıla sübh

Bağrım yarılar, sübhüm! açılma səni tanri

Dan ulduzu istər çıxa göz yalvarı çıxma

O çıxmasa da ulduzumun yoxdu çıxarı

Gəlməz tanıram bəxtimi indi ağarar sübh

Qaş belə ağardıqca daha baş da ağarı

Eşqin ki qərarında vəfa olmayacaqmış

Bilməm ki təbi`ət niyə qoymuş bu qərarı

Sanki xoruzun son banı xəncərdi soxuldu

Sinəmdə ürək varsa kəsib qırdı damarı

Rişxəndlə qırcandı səhər söylədi:durma

Can qorxusu var eşqin, utuzdun bu qumarı

Oldum qaragün ayrılalı o sarı teldən

Bunca qara günlərdi edən rəngimi sarı

Göz yaşları hər yerdən axarsa məni tuşlar

Dəryayə baxar bəllidi, çayların axari

Əz bəs məni yapraq kimi hicranla saraldıb

Baxsan üzünə sanki qızıl güldü qızari

Mehrabe-şəfəqdə özümü səcdədə gördüm

Qan içrə qəmim yox üzüm olsun sənə sari

Eşqi varıdı Şəhriyarın gülli-çiçəkli

Əfsus qara yel əsdi xəzan oldu bahari