ایسته رم من او گولی ، اؤز گولی خندانیم اولا اودا اؤز کونلونو وئرسین منه جانانیم اولا تکی جانانیله بیر یئرده گونوم خوش گئچسین آرزو ائیله ییرم باغ و گولیستانیم اولا قییمایان جانینه عاشیق دگیل اؤز یاری اوچون من فدا ائیله یه رم یاریمه مین جانیم اولا گونده یوز یول ائده رم جانیمی قوربان او گوله او دا بیر یول دولانیب باشیمه قوربانیم اولا بو پری چهره لرین بیرجه گوزللیک لری وار سئومه رم هئچ بیرین الده اگر ایمکانیم اولا نیله ییم کونلومه بیر قویمادی آسوده اولام گؤروم ای کاش کی ویران ، دل سوزانیم اولا واحید هر شوخه ایناندیمسا وفاسیز چیخدی بو گؤزللرله منیم حشرده دیوانیم اولا ------------------------------------------------------------------------ اولدوز سایاراق گوزله میشم هر گئجه یاری گج گلمه ده دیر یار یئنه اولموش گئجه یاری گؤزلر آسیلی یوخ نه قارالتی نه ده بیر سس باتمیش گولاغیم گؤرنه دؤشور مکده دی داری بیر قوش آییغام! سویلیه رک گاهدان اییلده ر گاهدان اونودا یئل دئیه لای-لای هوش آپاری یاتمیش هامی بیر آللاه اویاقدیر داها بیر من مندن آشاغی کیمسه یوخ اوندان دا یوخاری قورخوم بودی یار گلمه یه بیردن یاریلا صبح باغریم یاریلار صبحوم آچیلما سنی تاری! دان اولدوزی ایسته ر چیخا گؤز یالواری چیخما او چیخماسادا اولدوزومون یوخدی چیخاری گلمز تانیرام بختیمی ایندی آغارار صبح قاش بیله آغاردیقجا داها باش دا آغاری عشقین کی قراریندا وفا اولمیاجاقمیش بیلمم کی طبیعت نیه قویموش بو قراری؟ سانکی خوروزون سون بانی خنجردی سوخولدی سینه مده أورک وارسا کسیب قیردی داماری ریشخندله قیرجاندی سحر سویله دی: دورما جان قورخوسی وار عشقین اوتوزدون بو قماری اولدوم قره گون آیریلالی او ساری تئلدن بونجا قره گونلردی ایدن رنگیمی ساری گؤز یاشلاری هر یئردن آخارسا منی توشلار دریایه باخار بللی دی چایلارین آخاری از بس منی یاپراق کیمی هیجرانلا سارالدیب باخسان اوزونه سانکی قیزیل گولدی قیزاری محراب شفقده ئوزومی سجده ده گؤردوم قان ایچره غمیم یوخ اوزوم اولسون سنه ساری عشقی واریدی شهریارین گللی- چیچکلی افسوس قارا یل اسدی خزان اولدی بهاری