" وطن باغی " آل-الواندیر،
یوخ ایچینده خاری بولبول.
ندن هر یئرین الواندیر،
کؤکسون آلتی، ساری بولبول؟!
سحرین گولشن چاغیندا،
نه گزیرسن باغی، بولبول؟!
اوخودون، عاغلیم آپاردین،
اولدون منه یاغی، بولبول!
بولبول، سن نالا چکرسن،
گؤز یاشین گیله تؤکرسن،.
اون بیر آی جفا چکرسن،
بیر آیی دا زاری، بولبول!
بولبول، گئییبسن آل یاشیل،
قوللارین بوینومدان آشیر.
آغلاماق منه یاراشیر،
قوی آغلاییم، باری، بولبول!
بولبول سنی کیم اوچورتدو،
کیم دالدان دالا قاچیرتدی،
کیم سنه باده ایچیرتدی،
کیملر اولدو ساقی، بولبول؟!
