ایکی طیاره

 خوخانناز پنجره‌دن آتیلیر حیطه دئیر:«گؤرورسن نه اوچورام»

دئیرم:

-         یوخ! سنین قانادین یوخدور اوچا بیلمزسن. یالان دئمه!

خوخانناز قاچیب چادراسینی سالیر باشینا. قوللارینی آچیب  بیرده آتیلیر:

-         ایندی گؤردون اوچدوم؟ بو دا قانادیم!

-         یوخ! او اولماز. قانادین له‌لگی اولار اوستونده. سنین قانادین ینه بس گوللودور؟

من باشلامیشام گولمه‌یه آما خوخانناز فیکیرله‌شیر سونرا دئییر:

-         من قوش دئییلم له‌لگیم اولسون. من طیاره یم! باخ! بووووو!

بیرده پنجره‌دن آتیلیب طیاره سسی چیخاردیر.

-         طیاره‌نین ده قانادی بئله گوللو اولماز! دمیردن اولار.

خوخاننازین ال چکن گونو یوخدور. دوروب چئوره‌سینه باخیر. سونرا قاچیر آشپزخانالارینا ساری. قاییداندا الینده ایکی مئجمه ای وار. اونلاری اللرینده ساخلاییب پنجره دن آتیلیر: گؤردون دمیر قانادلاریمی! بووووو! بوووو!

منیم ده گؤیلوم اوچماق ایستییر. گئدیب ائومیزده ایکی مئجمه ای گتیریرم.

بیر آز سونرا ایکیمیز« بوووو» چیغیریب آتیلیریق. خوخاننازین آناسی گلیب تعجوبله بیزه باخیر:

-         نه ایش گؤرورسوز قیزلار؟

من دئییرم:

-         بیز قیز دئییلیک طیاره‌ییک!

 ائندیر-دانلود

رسام:کؤنول رنجبر

سس:تامای حسن زاده

قاری ایله تولکو

بیری وارمیش بیری یوخوموش.بیر قاری ایله بیراینک وارمیش.دار- دونیادا قارنین تکجه بو اینگی واریدی و اونون سودون ساغییب ،ساتییب ،روزگارین گئچیردردی.گونلرین گونونده قاری سودی ساغدیکدان سونرا ،سود قاپاغین قویوب باشقا ایشلرینه مشغول اولور.
گونلردن بیر گون ،قاری گئنه سودی ساغییب سود قاپاغین قویوب ائو ایشلرینه مشغول اولور،ایشلرین قورتاردیقدان سونرا گئدیر سودی گتیرسن کی بیردن گورورقابین ایچینده سود- موت یوخ!ایچی بوم- بوشدور!..یازیق قاری دولی سود قلبیت بوش گورونجه دوردوغی یئرده چاشیب قالیر،چاشدیقی حالده اوز-اوزونه دئیردی کی: بوی بو سود قابی دولویدی کی !سودی کیم بوشالدیب؟کیم ایچیب؟
ایکینجی گونده گئنه قاری ائو ایشلری قورتولدوقدان سورا سود قابینین سوراغینا گئدن زمان گئنه سود قابین بو ش گورور،بئله اوچونجو گونده گئنه سود قابین گئدیب بوشونی گورور داها دوزمییب قانی قارشیب سودی کیم ایچ دیگینی بیلمک اوچون سود قابین دولدوروب باشلیر سود اوغروسون گودمیه .آرادان بیر خیلک زمان گئچندن سونرا گورو رکی بیر تولکی ،ساغ – سولونا باخدیقدان سونرا اوزون سودقانین ایچینه سوخوب شاپیلدایا-شاپیلدایا سود ایچیر.قاری الی آلتیندا ساخلادیی چاپاجاقی گووروب آیاق یالین باواشجا باسا – باسا تولکویه یاخینلاشیر ،محکم تولکونو قولریوغونا ووروب بیر چیرپیدا اوغرو تولکونون قویروقون قوپاردیر.
بیلدیگنیز کیمی تولکو ده قویروقلی – مویروقلوی اولمالدیر.اوزوده اوزون قویروقلی!قویروقسوز تولکویه تولکو دئیلمز کی!...یوووخ؛دئیلمز کی دئیلمز!قویروق سوز تولکی تولکی سایلماز.
نه باشنیزی آغریدیم.تولکو قاریدان قویروقون آلماق اوچون باشلادی یالوارماقا،قارینی دیله توتوب دئدی کی: آی آنا ،آنافنه اولار،باشین دولانیم ،قویروقومو وئر!
قاریدا آجیغیندان تولکو یه دئمیش: سن اوله سن!گونو-گونوه او اوزون بورونو،اوزوم اللریمله اینگین امجکلریندن امدیگیم سودلری گیزلی گیزلی ایچنده خوشویدی!ایندی منده سنه قویروق – مویروق وئرمیرم!ایتیل گئت ایشینه
تولکو : من قویروقسوز هارا گئده بیلرم، من قویروقسوز اوتنارام.قویروقومی وئر گئدیم.
قاری: من قویروق – مویروم وئرن دگیلم!گئت اوغورلوقی ترک ائله.
تولکو:باشبن دونوم وئر قویروقوم
قاری: وئرم آما سن  اوشاپیلداتا-شاپیلداتا ایچن سودلری گتیر منه منده سنین قویروقونو وئریم.
تولکو نه قدر یالواردی قاریا کارسالمادی کی سالمادی سونوندا توکلو  قاریا سود تاپماق اوچون قویونون یانیتنا گئتدی.
تولکو قویونا دئدی:قویون باجی،قویون باجی،نه اولورمنه بیرآز سود وئرسن !آپاریم قاریا وئریم منیم قویوروقومی وئرسین.
قویوندا دئدی: وئره رم امما من گرک بیر آز یئشیل اوت وئرسن.
تولکو یولا دوشوب گئتدی اوتلاقاو دئدی: آی اوتلاق باجی،ائی گوزه ل اوتلاق باجی ،ائی یئشیل اوتلاق نه اولور منه بیر آز یئشیل اوت وئرسن آپارام قویونا اودا  منه بیر آز سود وئرسین منده اونی آپاریم قاریا اودا منیم قویروقومی وئرسین!
اوتلاقدا دئدی: سن منه گوزه ل قیزلار گتیریب اونلار منیم اوستومده اویناسینلار ،اوندا منده سنه یئشیل اوتلار وئره رم.
تولکوده گئدیب گوزه ل قیزلارا یالوارماقا باشلامیش کی: قیزلار،قیزلار گوزه ل قیزلار!ای گوزلرینه دوندویوم قیزلار!نه اولورباشنیزا دولانیم منه بیر آز یاردیم ائدسیز؟نه اولار،گلین بیر آز اوتلاقدا اویونایین تا اوتلاق منه یئشیل اوت وئرسین منده اونی اپاریم قویونا وئریم اودا منه سود وئرسین اونی آپاریم قاریا وئریب منیم قویروقومو وئرسین!
قیزلاردا تولکویه دئدیلر کی: بیزه اینجی –مرجان گتیرسن بیزده گلیب اوتلاقدا اویناروق!
قزلارا اینجی – مرجان آلماق اوچون تولکو قیزیلچی دوکانینا گئتمیش.قیزیلچی یه تولکو دئمیش:قیزیلچی ای قیزیلچی باشی!منه بیر آز اینجی وئر آپاریم گوزه ل قیزلارا اونلاردا گلیب اوتلاقدا اویناسینلار سونرا اوتلاق منه یئشیل اوت وئرسن آپاریم قویونا اوندان سود آلیب آپاریم قاریا اودا منیم قویروقومو وئرسین!
قیزلچی دئمیش: منه یومورتا لازیمدیر ،گئت منه یومورتا گتیر .
قیزیلچیا یومورتا گتیرمک اوچون تویوقلارین یانینا گئتمیش،تویوقلارا دئمیش: تویوقلار،ای تویوقلار،گوزه ل، فریک تویوکلار،منه یومورتا وئرنیز آپاریم قیزیلچیا ،اودا منه اینجی وئرسین آپاریم گوزه لقیزلارا اونلاردا گلیب اوتلاقدا اوتلاسینلار من بیر آز یئشیل اوت وئرسینلر،اوتی آپاریم قویونا اودا منه سود وئرسین سودی آپاریم قاریا اودا منیم قویروقومی وئرسین،دئمیش.
تویوقلاردا دئمیش ،بیزه بوغدا گتیرسن بیزده سنه یومورتا وئرریک.
تولکو بوغدا آلماق اوچون اکینه گئتمیش.اکینه دئمیش: اکین،ای گوزه ل اکین !منه بیر آز بوغدا وئر،آپاریم تویوقلارا آونلاردا منه یومورتا وئرسینلر،آپاریم قیزیلچیا اودا منه اینجی وئرسین آپاریم گوزه ل قیزلارا ،اونلاردا گلیب اوتلاقدا اویناسینلار اوتلاق منه یئشیل اوت وئرسین آپاریم قویونا ،قویون منه سود وئرسین آپاریم سودی قاریا اودا منیم قویروقومی وئرسین!
اکین دئمیش منه سو گتیرسن منده سنه بوغدا وئرم.
تولکو یولا دوشوب چایا ساری گئتمیش.چایا دئمیش : ای چای آخار- داشار سولو چای نه اولورمنه بیر آز سو وئرپاریم اکیینه ،اودا منه بیر آز بوغدا وئرسینآپاریم تویوقلارا اونلاردا منه یومورتا وئرسینلر آپاریم قیزیلچیا اود منه اینجی وئرسین آپاریم گوزه ل قیزلارا اونلاردا گلیب اوتلاقدا اویناسینلار اوتلاق منه یئشیل اوت وئرسین آپاریم قویونا ،قویون منه سود وئرسین ،سودی آپاریم قاریا اودا منیم قویروقومی وئرسین.
نه باشنیزی آغریدیم ،چای تولکویه سو وئرمیش،تولکوده سویو گوتوروب اکینه آپارمیش اکینده بیر آز بوغدا وئریب ،تولکوقارداش بوغدالاری آپارمیش تویوقلارا ،تویوقلاردا بیر نئجه دانا یومورتا وئریب ،یومورتالاری آپاریب قیزیلچیا وئرمیش،قیزیلچیدا بیر نئجه دانا گوزه ل و ایری اینجی-مرجان وئریب ،تولکوده آپاریب قیزلارین اتکلرینه توکموش،اوندان سونرا قیزلاردا دئدیکلری کیمی گلیب اوتلاقدا اویناماقا باشلامیشلار،اوتلاقدا سئویندیگیندن یئم – یئشیل اوتلار تولکویه آرماغان ائلمیش،تولکی اوتلاری قویونون یانینا آپاریب بیر آز سود ساغییب قاریا آپارمیش،قاریدا تولکودن سوز آلدیقدان سورا کی بیر داها اوغورلوق ائلمسین تولکونون قویروقون قئری وئرمیش.
تولکو سئوینه – سئوینه قویروقون گوتوروب ،سوپورگه باغلادیگی قویروق یئرینه اوز قویروقون یاپیشدیرمیش ؛بیداها دا اوزیله عهد قیلیر کی اوغورلوق ائلمسین چون بیلیردی کی اگر بیرداها اوغورلوق ائلسه داها هیچ کیم دادینا دورماییب اونا کومک ائدن اولمایاجاق.
بئله لیکله تولکو ،یئدی ،ایچدی،مطلبینه یئتیشدی،سیزده یئیین ؛ایچین ،مطلبینیزه چاتین.سیز ساغ من سلامت ،سیز یوز یاشین من ایکی اللی.

آغیللی قیز و تنبل احمد

حامام حامام ایچینده،جویز گیردکان ایچینده،دوه دله کلیق ائیلر،کوهنه حامام ایچینده،قاریشقا شیلاق آتدی دوه نین بودی باتدی.
بیری واریدی،بیری یوخی یدی،بیر پادشاهین وزیری واریدی.پادشاها یامان داریخان حال یدی ،اما وزیری صبیرلی و دونیا گورموش قوجایدی.
بیر گون پادشاه اوودان قایداندا یولدا بیر قیچی آخساق ،بیر گوزی کور قاریا راست گلدی.قاریا یازیقلیغی گلیب ،چاغیردی اونا پول وئرمک ایسته دی.دئدی:
-     آی قاری ،بورالاردا نه گزیرسن،ایشین – پئشه ن ندی؟
-   منیم پیشم ائو تیکمک،ائو ییخماق دیر!
پادشاه دئدی:- سن نسن کس ،ائو تیکیب،ائو ییخیسان؟
قاری دئدی:- بالا سن هله بیلمیرسن کی،آرواد یئخمایان ائو مین ایل تیکیلی قالار!
پادشاه بو سوزدن خوش گلمدی.
وزیر دئدی:- قیبله عالم ساغ اولسون ،آروا د دوز دئیر.
پادشاه دئدی: - یوخ ،یالان دئیر.
پادشاهین اوچ گوزه ل قیزی واریدی.قیزلارین باشینا ییغدی،بویوک قیزا دئدی:
- بالا،ده گوروم ائوی آرواد تیکر یا کیشی؟
بویوک قیز دئدی:- البت کیشی!
پادشاه اورتا قیزینادا دئدی:- سن دئ گوروم ،ائوی آرواد تیکر یا کیشی؟
اورتانجی قیزدا دئدی:
- آتا آرواد نه دیرکی اونون تیکدیگی ائو نه اولا! ا لبت ده ائوی کیشی تیکر.
پادشاه بو دفعه ده کیچیک قیزیندان سوروشدی کی :
- قیزیم،بس سن نه دئیرسن؟
کیچیک قیز دئدی: - آتا ائوی آروا د تیکه ر.
بو سوز پادشاها یامان توخونوب دئدی کی:
- ندن کی بئله اولور،سن ائوسیز – ائشیک سیز لوتون بیرینه وئره جگم.اوندان سونرا باخاق گوره ک سن نئجه ائو تیکجه کسن.
شهرین لاپ کناریندا قاری بیرقوجانین تنبل اوغلی واریدی.آدینادا "تنبل احمد" دئیردیلر.احمد اوقدر آجیزی دیر کی هیچ یئریندن ترپنمک ایستمزیدی.پادشاه قوجا قارین چاغیردیب دئدی کی:
- قاری من کیچیک قیزیمی سنین اوغلونا وئریرم،آپار اونی دا،گئت.
قاری دئدی:
- ای پادشاه تصدیقین اولوم ،سنین قیزین هارا،منیم اوغلوم هارا؟اوغلومون اینینده بیر پالتاروار،چیغیرسان جانی چیخار،یئمیه بیر تیکه چوره گی یوخدی.اوغلوم او قیزی نئجه ساخلار؟
پادشاه دئدی:
- قاری ،سنین ایشین اولماسین .آپار قیزیم وئردیم سنین اوغلونا.
قاری ،کور- پئشمان قیزی یانینا سالیب گئتدیلر ائولرینه.احوالاتی اوغلانا دئدیلر.احمد بو ایشه لاپ معتل قالیب ،قیز ائوه گلندن سونرا باخیب گوردی کی،احمد اوقدر ارینجک دیر کی ،هیچ یئریندن ترپنمک ایسته میر.چوره گی ده ائله یاتدیگی یئرده یئییر.اودی کی پادشاهین قیزی سفره نی ائوین لاپ یوخاری باشیندا سالدی .احمد چاغیردی کی ،منیم پاییمی گتیرین یئریمه یئییم.
قیز راضی اولمادی.احمد گوردی کی،اجیندان اولجک، علاجی کسیلیب سورونه- سورونه قیراقینا گلدی.قیز هرگون ائوین یوخاری باشینا سالیب احمدی اورا چاغیراردی.بیر نئچه گوندن سونرا احمد دای اوزو دوروب گئدیردی سفره باشینا.قیز گوردی احمد قوچاقلاشیب.بو دفعه سفره نی باخچادا،گوی اوتون اوستونه سالدی.احمدی چاغیردی.احمد گئنه گئتمک ایستمه دی.قیز گئدیب ایته لیه- ایتله یه احمدی سفره باشینا گتیردی.احمد چوره گی ییئییب گئنه گئتدی ائوه .بئله- بئله قیز هر گون سفره نی حیتده سالیب احمدی اورا آپاریردی.آرادان بیر نئچه گون گئچندن سونرا پادشاهین قیز احمدی کوچه یه آپارماق ایسته دی. احمد کی گیردکانی و فیندیقی چوخ سئوردی ؛ قیز قاپیا گیردکان ،فیندیق،توکوب احمدی کوچه یه چاغیردی،و دئدی: آی میتیلین بیری،ائوده اوتوروب نئیلیرسن؟
احمد بیر تهر دوروب فیندیقلاری ،جویزلری ییغیشدیرا – ییغیشدیرا دوز کوچه قاپیسینا چیخدی.ائله بو واخت کوچه ده قودو- قودو اوینایردیلار.احمدین خوش گلیب ،بیر آزدا ایرلی گئدیب قودی- قودی یه باخدی. سونرا قایدیب ائوه گلدی.پادیشاهین قیزی ائله کی،گوردی احمد کوچه یه چیخماق اورگینده ،باشلادی:
- گرک گئدیب ایشله یسن.
احمد دئدی: - آخی من نه ایش گوره بیلم؟
قیز دئدی:- سن چیخ کوچه یه ،دئنه کی ای ایش گوردورن،ای ایش گوردورن.
کیم سنه یاخینلاشیب بیر سوز دئسه گئت،او سنه ایش گوردوره ر.
احمد بیر تهر کوچه یه چیخارتدی.احمد یولون اورتاسیندا دوروب هردن بیر :"آی ایش گوردورن" دئیردی.بیردن بیر کیشی گلیب احده دئدی: - اوغول منیم بیر باغیم وار،گل اونی بئله،هرگون سنه بیر شاهی پول وئره م.
احمد کیشینین یانینا دوشوب گئتدی.آخشاما قدر اونون باغیندا یئر بئله دی،بیر شاهسین آلیب گلدی.یولدا گوردی کی،پیشیک ساتیلار.بیر شاهسین وئریب پیشیگی آدلدی.احمد ائوه گلدیگینده پادشاه قیزی دئدی:
- احمد نه قازاندین؟
احمد دئدی:- بیر شاهی قازانمشیدیم،اونو دا وئردیم بیر پیشیک آلدیم.
قیز دئدی:- احمد سن صاباحدان سفره چیخیب گزه سن .
احمد دئدی:- من نجور سفره گئده بیلرم؟
قیز دئدی: - صاباح گئدرسن بازارا ،یولون قیراقیندا دایانیب گوزلیرسن. گوره جک سن کی،دوه کروانلاری گئدیر.گئدیب کروان باشیا دئیرسن کی منی ده اوزونوزله آپاراسینلار،یولدا سیزه کومک ائدرم.اوندا اولار راضی اولارسا گوشولوب گئدرسن.
سحر آچلیب ،احمد قیز دئدیگی کیمی ائله دی.گئدیب یولون کناریندا گوزلدی.گوردی کی ،دوه کروانلاری گلیر،گئدیب کروان باشینا دئدی:
- منیده اوزونوزله آپارسیز؟
کروان باشی دئدی:- آپارام،من گویده آدام آختاریردیم،ایندی یئرده الیمه دوشدون.
دئمه کروان باشی کروان قاباقیندا بئله بیر آدام اپارارمیش.یولدا بیر صحرالیق واریدی.اوردان گئچنده کروانین سویو تامام قورتولموشیدی.همان صحرادا بیر قویو واریدی.کروان باشی یانینداآپاران آدامی بو قویویا سالاردی تا اوردان سوچکسین.سونرا آدامی گئیتره رمیش.
کروان باشی احمدی اوزیله گوتوروب یولا دوشدولر.آز گئدیبب چوخ دایاندیلار،چوخ گئدیب آز دایاندیلار،داغلار آشیب ،سولار گئچدیلر،گلیب همان صحرایا چاتدیلار.سولاری تامام گورتولموشیدی.آداملار ،دوه لر سوسوزلاریندان یانیردیلار.کروان باشی احمد دئدی:
- بالا گل سنی سالایاق قویویا سن بیر آز بیزه سو چک.
احمدین هیچ ندن خبری اولماییب ،گلدی قویوباشینا.بئلینه ایپ باغلاییب سالادیلار قویویا .احمد قویونون تکینه یئتشیب کندیری آچیب ،بیر خئیلی گئتدیکدن سونرا بیر چایا  راست گلدی،تولوخلارینی دولدوروب هایلادی کی،چکسینلر.ائله تولوخلاری تازا چکمیشدیلر کی ،بیردن نریلتی قوپدی،احمدین آز قالدی باغری چاتلاسین.بیر ده گوردی باشی اوسته بیر بدهئیبت دئو دوروب.دئو نه دئو ،بویو میناره،قولاقلاری چینار آغاجی،بوینوزلاری تیزه کیمی ،یئددی باشلی.هربیر قولوندا یئددی دگیرمان داشی،آلت دوداغی یئرسوپورور،اوست دوداغی گوی سوپورور.آغیزی دگیرمان کووره یی.
اجمد ایسته دی  قاچا،گوردی یوخ ،اولاسی ایش دگیل.قاچماقا یئریوخ .دئو دئدی:
- ای بنی –آدام ،بورا قوش گلسه قاناد سالار،ایندی سنین اتینی قاشیقجان،سوموگونی آشیقجان ائیله یجگم.هارا قاچماق ایستیرسن؟گل دالیمجان.سندن بیر سوز سوروشاجاقام.اگر جواب وئره بیلسن سنینله ایشم یوخ ،جواب وئرنمه سن اوندا اولمه لیسن.
بئله؛احمد قورخوسوندان توت یارپاقی کیمی اسه - اسه دئوین دالیجا گئدیب بیر قصره چاتدیلار.قصر نه قصر!هر یئر زر- زیبا ،اتاقلار قاش- داشلی،لعل- جواهیراتدان دوپ دولی.بیر جاه- جلال وار کی،آدامین آغیزی آپیق قالیر.دئو اتاقدان – اتاقا گئچیب اوتوز دوققوز قاپی آچدی،قیرخینجیدا دایاندی. ایچریده بیر قیزیل مژمییده کی یاشلی قورباغا باخیب دئدی:
- ای بنی – اینسان دئ گوروم دونیادا ان گوزل نه دیر؟
احمد دئدی:- ان گوزل کونول سئوندیر.
بو سوز دئوین خوشونا گلدی،چون اوزی همان قورباغانی سئوردی.دئو احمدی اولدورمیب ،اونا بیر نار،بیر گیردکان باغیشلادی.احمد دئودن آیریلیب دوز گلدی قویونون دیبینه ،نه قدر سسله ندی ،هاراینا چاتان اولمادی.چون کروان کوچوب گئدمیشیدی.
سنه کیمدن دئییم ،پیشیکدن.احمد کروانلا یولا چیخاندا اونودا اوزیله گوتورموشیدی.ائله کی احمد قویودا قالدی،کروان یولا دوشدی،پیشیک قویونون باشیندان ال چکمدی،قویونون قیراقیندا اویان بویانا ،بویاندان اویانا گئدیب میولدایردی.بیر گون، بیرگئجه اوردا دایاندی.
سحر تئزدن اوزاقدان بیر کروان گلیردی.کروان گلیب قویونون یانیندان کئچنده کروان باشی گوردی کی بیر پیشیک قویونون باشیندا اوزون الک – فلک ائله ییرکروان باشی قوینون یانینا گلیب گوردی کی سس گلیر کی:
- ای یولدان گئچین منی قویودان چیخاردین!
کروان باشی یولداشلارین چاغیردی ،کندیر سالیب احمدی قویودان چیخارتدیلار.احمد باشینا گلن قضا – قدری سویلدی.سونرا کروانلا بیرلیکده گئدیب بیر شهره چاتدیلار و بیر ائوه قوناق اولدولار .آخشام چاغی سفره سالنیب یئمکلر اوتایا قویولدوقدان سونرا ائو اییه سنین کی اوشاقی چوخیدی گلیب هر بیراوشاق بیر توخماق آلیب اونلارین باشلاری اوستون کسدیلر.کروانداکیلار بئله فیکیر ائله دیلر کی اونلارایستیرلر اولاری اولدورسونلار.اونا گوره کروان باشی دئدی:
ای قارداشلار اگر سیز بیزلری اولدورمک ایستیرسیز باری چوره ک یئمدن اولدورون ،تا چوره ک یئمدن جانمیز قورتارسین.بونه عادتدیر کی چوره ک وئریب اولدورورسوز؟
ائو اییه سی دئدی:
- بیز سیزی اولدورمک فیکرینده دئیلیز.قویون اورتالیقا چوره ک گویولسون اوندان سورا گورون کی،بیز نه یی گوزلوروک.
چوره ک سالینان همان بیردن بیره سیچانلارین توکولمگی همان ،اوقدرسیچان توکولدی کی بیر دامجی چوره ک قالمادی.سن دئنه توخماقلاری ائله بوندان اوتری ساخلامیشدیلار.اما هرنه توخماقلا سیچان وئردیلار بئش اون سیچاندان چوخ اولدوره بیلمه دیلر.سیچانلاردا قاچیب یووالارینا گیردیلر.کروانداکیلار لاپ شاشقین قالمیشدیلار کی بیردن احمد ائو اییه سینه دئدی:
- قارداش مگر سیزده پیشیک یوخدورکی گتیریب بونلاری قووالاسبنلار.
ائو اییه سی دئدی:- پیشیک نه دی ؟بیزیم یئرده ائله بیر شئی یوخ!.
احمد گوردی کی بورالاردا پیشیک یوخ اونا گوره ده گئدیب اوز پیشیگین گتیردی.تازادان یئمک گتیردیلر.احمد پیشیگی ائوه بوراخدی.سیچانلار باجالاردان چیخان زمان پیشیک بیرین بوردا،بیرین اوردا باسمارلادی. هامیسین بوغوب اولدوردو.ائواییه سی بوایشه لاپ حیران قالمیشی دیر.اودی کی احمدینن دانیشدی کی پیشیگی دوه یوکی دولی قیزیلا دیشسینلر.احمد بونلارین هامسین دوه لره یوکلدی و ائوینه ساری یولا دوشدی.اوزوده هریئره یتیشدیگی زمان اوردادا آل-وئر ائله ییب چوخلی چول قازاندی.سونرا پولاری و قیزیلاری تاپشیردی کروان باشینا تا اولاری ائوینه قایتارسین.
بونلاری بوردا قویاق،سیزه کیمدن خبر وئریم ،پادیشاهین کیچیک قیزیندان.قیزدا قیزیلاری آلان زمان گئدیب بازاردان بیر نئچه بنا و بیر چوخ عمله توتوب بیر یئددی مرتبه عمارت تیکدیرمگه باشلادی.بیر عمارت اولدی کی ،پادیشاهین عمارتی بونون یانیندا داخمایا اوخشایردی.قیز احمدین گوندردیگی ناری بولوب یئمک ایستین زمان گوردی کی دولودور لعل – جواهیرله دوروب اونلار ی بازارا آپاردی وائو بیر چوخ آیین – اویون آلدی.خیلک زماندان سونرا احمد سفردن دونوب ائوینه قایتدی.
اوز ائوینین یانیندا یئددی مرتبه بیر عمارت گوردی .قاپیداکی نوکرلردن اوز ائونین یئرین سوروشدی .دئدیلر کی،: - سن دئدیگین ائو ائله بوراسدیرائو ائله بو عمارت دیر.احمد ائله بیلدی کی اونی اله سریبلر.بیرده خبر الدیب: - ای قارداش منی اله سالما دوزون دئ بورا کیمین ائویدر؟
بو بحثیدن و احمدین های – کوی دن آناسی قاپیدان چیخیب ،اوغلونی قوجاقلاییب دئدی:
- آی اوغول یوخسا ائوینی تانیمیرسان؟سن گئدندن سونرا آروادین تیکدیریب.
بلی ،احمد ائوه گلیب و ائوین جاه- جلالین گوروب ،حیران قالدی.پادشاهین قیزی اونی گوروب قاباقینا چخیدی.ائوی نجور تیکدیگینی اوندان سوروشدی.سونرا احمد بیر دست ایچپکدن پادشاهلارا لایق پالتار وئریب گوزه ل گئیندیردی.پالتارلاری احمده گئیندیردیکدن سونرا دئدی:
- ایندی حاظیراوق گئداق آتامی قوناق چاغیراق.اوسندن نه سوروشسا دوزون دئ.
سحر اولوب ،قیز پادشاهین بوتون آداملاریله بیر لیکده ائولرینه قوناق چاغیردی.پادشاه قیزی گیله گلدیگینده ائوی گروب گوزلرینه اینانمادی .اوز ساراینین یانیندا بئله طوله حسابیندایدی.یئییب-ایچدیکدن سونرا پادشاه احمددن سوروشدی:
- دئین گوروم بو جلالی کیم دوزلدیب،یو ائو کیم تیکیب؟
احمد بوتون احوالاری باشدان-ایاقا پادشاها سویلییب دئدی:
- پادشاه ساغ اولسون بو ائو سنین قیزین تیکیب.
قیزبو سوزی ائشیدن کیمی گیریب اوزون آتاسینا توتوب دئدب:
- آتا ایندی گوردون کی ائوی آرواد تیکر نه کیشی!
پادشاه قیزینین دوغری دئدیگینه اینانیب قبول ائتدی و باشین اشاغی سالدی.تازادان یئددی گون یئددی گئجه توی توتوب قیزین احمده وئردی.
گویدن اوچ آلما دوشدی،بیری منیم،بیری اوزومون،بیریده ناغیل دئینین.من ساغ سیز سلامت،من یوز یاشیم ،سیز ایکی اللی،هانسی چوخدی سیزین قالانین منه وئرین.

Bayatılar

Ağ güli atanmıram

Yalqızam yatanmıram

Yarımi itirmişəm

Axtarıb tapanmıram

******************

Bu sazi alan gəlməz

Oxuyub çalan gəlməz

Igidi öldürsələr

Dilinə yalan gəlməz

*********************

Obadan baxan gözəl

Yandırıb yaxan gözəl

Rəhm eylə bir az mənə

Evimi yıxan gözəl

*********************

Qapiyə daş qoymuşam

Qaş ustə qaş qoymuşam

Ölləm səndən dönmərəm

Yolunda baş qoymuşam

*********************

Qış dolanar yaz olar

Göldə ördək qaz olar

Hər nə desən qıza de

Gəlin kələk baz olar

*********************

Su gələr daşa dolar

Qar yağar qaşa dolar

Yar yardan ayrılanda

Gözləri yaşa dolar

چوخ یالواردیم

دئدیم ، اغیار ایله گزمه ، سنه چوخ یالواردیم ،

ایندی دینجل ، گوزلیم ، منده اولوب قوتاردیم .

بیر صداقتلی گوزل تاپمادیم عالمده ، غرض ،

بو آز عومروده چوخ اطرافی گزیب آختاردیم .

جان هانی منده ، منی عشق دیر ایندی یاشادان ،

اونو جانان منه وئرمیش دی ، یئنه قایتاردیم .

کونلوم آلداتدی منی حسنونه مه پاره لرین ،

سانمایین ، من بو وفاسیزلارا بئل باغلاردیم .

فله کین قدی بوکولموش سه ، من اوندان قوجایام ،

اونداکی ، یوخودو نه دونیا ، نه فلک ، من واردیم !

سنی من ایسته دییم گونلر اولوردوم سن سیز ،

عشقیمین سرینی کونلومده نهان ساخلاردیم .

واحیدم ، عشقده من ایندی ده ثابت قدمم ،

وارام اوز یاریم ایله من نئجه اول واردیم .

                                             علی آقا واحید

گئدیشین گتیردی...

گئدیشین گتیردی غمی ، غصه نی ،

قلبیم سئوه بیلمز داها کیمسه نی

هر گئجه رویامدا گورورم سنی ،

یوخومو آپارا بیلمه یه جک سن.

گئتدیین یوللارا حسرتله باخدیم،

دنیز تک کوکره ییب ، چای کیمی آخدیم.

منیمله قالاجاق بو قارا بختیم ،

بختیمی آپارا بیلمه یه جک سن.

گوناهین قارشینا چیخاجاق سنین ،

تنهالیق قلبینی سیخاجاق سنین ،

آهیم یاندیراجاق یاخاجاق سنی ،

آهیمی آپارا بیلمه یه جک سن.

گؤزومون یاشینی سیلسم ده بئله ،

سن سیز دردلی - دردلی گولسم ده بئله ،

من سنین دردیندن اؤلسم ده بئله

روحومو آپارا بیلمه یه جک سن...

                                                 نصرت کسمنلی