مودرک آتالاریمیزین سوز خزینه سیندن(1) علی سلیمانی
آنا چیخان آغاجی، قیزی بوداخ بوداخ گزر
قدیم چاغلاردا، دلی جوشقون آرازین ساحلینده یرلشن بیر کنده، بیلی بوکولوب ، ایاغی گوردان سالانان بیر قوجا کیشی یاشایردی. بو قوجانین ینی بویا باشا چاتان بیر اوغلو واریمیش بو اوغلانین یریشیندن یر تیتریر وچوخ چوخ اوزیندن راضی و اوزونی قبله عالم سانارمیش، بیله کی ، دیرمیش دنیا منیم بو اوجیمدادیر. وریب یخماقدا قارشیسینا چیخان یوخ ایمیش . آتاسی اوغلونا معنالی معنالی باخیب، تبسم ایدیب دیردی، هه آی اوعول دنیانین هله ایستی سویوغونو گورمیبسنکی، بیلسن بو دنیادا نه وار نه یوخ . آوغولدا آتاسینا باخیب، گوله گوله دیردیکی آی اتا من بو دنیانین شاختالی بورانلی قیشندا گورمیشم ، قیزمار ایستی یاییندا. قوجا جوابیندا دیرکی آی اوغول بو طبیعتین ایستی سویوغودی هله سن حیاتین ایستی سویوغونی گورمیبسن. اوغول تکبرله قولارینی آتاسینا گوسترردی و آتا تبسم له اوغلونین قارشیندا سوساردی.
بیر گون اوغلانین آناسی سئوینه سئوینه گلر ارینین یانینا و دیرکی ; آ کیشی خبرین وارمی اوغولوموز بیر قیز سئویر؟ کیشی گوزلنیلمدن بو سوزی ایشیدنده ، توک ویران آدام کیمی دونوب دایانیر، هاچاندان هاچانا اوزینه گلیب، سرسم سرسم دیرکی آی آرواد کیمین قیزینی؟ آرواد دیرکی آ کیشی بیزین نزنین قیزینده؟ کیشی آروادین دیدیگی سوزلردن چاش باش قالیب، حالدان حالا دوشوب بیلمیر نه دئسین؟ کیشینین بو چاش باش قالماغینا آرواد تعجبلنرک سوروشارکی ; آکیشی نه اولوب ، گوزیمیزین آغی قاراسی بیر اوغلوموز وارده، یدی لر اوسته تاپمیشیق، بیز بیرده بو یاشدا بو باشدا اوغول قیز اکمیجیکی. اللهین قسمتی ندی ؟ اودی. کیشی آروادنین قارشیسیندا ال ایاغینی توپلایب دیرکی; آرواد نه پیس یرده آخشاملادیق. الله رحمت ایله سین قدیم کیلری دیب لرکی آناسینا باخ قیزین آل ارشینینه باخ بیزین آل . دوزدن آرواد بو سوز منی بیر آز چاشدریب، بیلمیرمکی نه دیم آخی. اوت کوکی اوسته ، بیتر. اوغلوموز سئودیگی قیزین آناسی کیمدی هیچ، قوجاسی 6 آیلیق بالاسینی قونداقدا قویدی، دوز یدی دفعه اره گئتدی . گئد اوغلوا دینن آغلیوی توپلا باشیوا بو قیزدان سنه آرواد اولماز، آلارساندا اوزون بیل، آی اوغول. حیاتدا چوخ گوزلیگه اویما.
آرواد دوروب گئدر اوغلونون یانینا و آتاسینین دیدیکلرینی اوغلونا چاتدیرار. اوغول شاقیلدیب گوله گوله دیر آی آنا قدیمکیلر قدیمده قالدی ،کرملیکده بیر گول بیتیب اونی من دریرم. اوغول بیله لیکله صون قرارینی وریر او قیزلا ایولنیر. آتا نیجه گون طوی توتیر عاشیقلار چالیر. ایل آداملاری ییب ایچب شنلنیر و ایل عادتیله زورنا قاوالا گلینی گتیریلر بخت ائوینه.
گلین، قاینانین، قایناتانین گیجه گوندوز خیدمتینده دوریر، بیله کی بو گلینی هامی بارماقلا گوستریلرکی نیجه ادب ارکان صاحیبیدی . گون به گون ایل طایفا آراسیندا شهرتی یایلیر خطیر حرمت قازانیر. زامان کچیر آیلار، ایللر اوتیر، گوزل کویجک اوچ بالا صاحبی اولور. گلینله اوغلان قایغیسزبیر عایله کیمی خوشبخت یاشیردیلار. اما دیمه آتالار دیمیشکن سن سایدیغینی سای هله گور فلک نه سایر. هله دیمه سن ، دلی روزگارین سرت کولگی اسیب او گلنین اوزیندکی اورپگی گوتریب اصل سیماسینی گوسترجکمیش.
حیاتین غریبه ایشلری وار. اوغلانیندا آتا، آناسی قوجالیب بو دنیانیلا وداعلاشیلار. بیرگون بو اوغلان چتینلیکله قاریشلاشیر، ائو ایشیگیندن دیدرگین دوشوب، چاره سیزلیکدان وطنینی ترک ایدیب ، باشقا بیر ئولکیه گئدیر. بیر نیجه آیدان صونرا اوغلانا خبر چاتیرکی سنین آروادین باشقا بیر اوغلانلا سویشیب و اونی گتیریب سنین ائوینه سالیب و ایندیده اونلا بیرگه یاشیر. بو سوز اونی برک سارسیدیر. سانکی دنیا باشینا اوچور و همین آن رحمتلیک آتاسینین دیدیگی سوزلر یادینا دوشور; آی اوغول آنا چیخان آغاجی، قیزی بوداخ بوداخ گزر. اما حیف کی اوغلان آتاسینین نه دیمک ایسته دیگینی باشا دوشنده، آرتیق گیجیدی.
-